Nihánj me nana a'mii nij
síí man gaa naá che'é
xtaa ga yachrúú a
Ne'en soj me xcuu cu'naj xtaa na'. Xtaa me xo',
tzaj ne xta' chéé xo' a. Xta'
chéé xcuu cu'naj xtaa yo' a.
Tzaj ne tumé xcuu cu'naj xtaa doj
tzin' cacun' a. Chá xo' chuchee daán chana
a. Chá xo' chuchee le'ej a. Xra' chuchee
le'ej, gaa ne guun nocoo chuchee
le'ej, ne chéé chuchee le'ej ga
nii xo' a. Ne urihanj xtaa, ne
chá xo' a.
Tzaj ne nuveé rihaan yo'óó chéé xtaa ma'.
Raa chruun táá xo' a. Táá xo', tumé xo'
a. Gaa ne ne achríj rá chuchee le'ej,
vaj xo' rihaan yo'óó ma'. Nanij xtaa 'na' xo', ne
anó xo' chuchee le'ej, ne cavii xo' xta'
ga chuchee le'ej nanj á. Danj
'yaj xtaa yo' a.
Nihánj me se taj nij síí man gaa naá
a. Gaa a'ngaa chana, gaa ne
niha' uxrá rá xtaa yo', taj nij síí man gaa
naá a. "A'ngaa se rque chaj
a. Se rque chaj a'yuj yataj me chana
yo'", taj xtaa yo' a. Gaa snó'o a'ngaa, gaa
ne ne niha' rá xtaa yo' ma'. Danj
vaa se-cuento xtaa yo' a. Navij se-cuento
xo' a.
Nanj vaa se-cuento yachrúú uún a.
Ne'en soj me xcuu cu'naj yachrúú na'.
Yachrúú me xo', tzaj ne nuveé xcuu
chéé rihaan yo'óó me xo' ma'. Xcuu chéé xta'
me xo' a. Yachrúú cu'naj xo' a.
Yachrúú me se niha' uxrá rá gaa a'ngaa
snó'o a. "A'ngaa se rque chaj",
taj yachrúú yo' a. "A'ngaa ta'níj ne'ej",
taj yachrúú yo' a. Ta'nij yachrúú yo' me
snó'o, taj yachrúú yo' a. "Se rque chaj
a'yuj yataj me so'", taj yachrúú yo' a.
Gaa ne chana a'ngaa, gaa ne
uchráán yachrúú yo', taj nii a. Ne niha'
rá yachrúú gaa a'ngaa chana ma'.
Uchráán yachrúú yo' gaa a'ngaa chana a.
Tzaj ne snó'o a'ngaa, gaa ne guun
niha' rá so' cata so' burro a. Guun
niha' rá so' cata so' cuayó a.
Scúj do', matzinj do', chuvee do', guun
niha' rá so' cata so' daj a
xcuu nanj á.
Gaa ne vaa güii, ne cano chi'ii
man cuayó a. Cavi' xo' nanj á.
Dan me se chá yachrúú yo' a. Vaa güii cavi'
burro nanj á. Nacaj yachrúú, cha
xo' a. Vaa güii cavi' chuvee nanj
á. Nacaj yachrúú, cha xo' nanj
á.
Se cha xo' me nij xcuu cata snó'o, taj
xo' a. Niha' uxrá rá xo' gaa a'ngaa
snó'o a. Ta'níí xo' me ne'ej sno'o, taj xo'
ni'yaj xo' man snó'o a. Danj vaa
se-cuento xo' a.